eco

1. s m

   1. Fenómeno que consiste na reflexión de ondas sonoras por un obstáculo, de maneira que o oído recibe a onda reflectida cun certo atraso respecto á onda directa.

   2. Reflexión de ondas radioeléctricas que dá lugar a efectos de repetición dos sinais recibidos.

   3. Fenómeno análogo ao eco acústico polo que aparecen na pantalla do televisor unha ou máis imaxes parasitas desprazadas lateralmente respecto á principal.

   4. Aparición, na pantalla do aparato de radar, do punto luminoso correspondente á onda devolta por un branco.

2. s m

   1. Son que se percibe de forma débil e confusa.

   2. Son que perdura na memoria.

3. s m

   Noticia imprecisa dun suceso.

4. s m

   Repercusión, efecto ou influencia de alguén ou algo.

5. s m [LIT ]

   Artificio poético que consiste na repetición dos sons vocálicos e consonánticos finais a partir da derradeira sílaba acentuada dunha palabra, na seguinte palabra.

6. 1. s

      Repetición debilitada dunha frase musical ou dunha nota.

   2. s

      Repetición das derradeiras palabras ou sílabas cantadas por un coro a media voz.

   3. eco dun órgano

      Cuarto teclado manual do órgano que reproduce dunha maneira apagada os sons dos outros teclados.

7. s m [PSIC ]

   Imitación ou repetición de movementos, palabras, xestos ou escritos.

8. eco do pensamento [PSIC ]

   Fenómeno alucinatorio que consiste na percepción auditiva do propio pensamento, como se proviñese de fóra.

Frases feitas

• Facerse eco de. Difundir unha noticia.