acto

1. s m

   Feito realizado polo home, efecto dunha determinación da vontade.

2. s m

   Acontecemento ou feito público.

3. s m [FILOS ]

   Estado de existencia real que se opón á potencia na filosofía de Aristóteles.

4. s m [LING ]

   Unidade significativa de produción verbal na que concorren a un mesmo tempo pronuncia e significado, intención coa que se dixo algo e repercusións que ten o que se dixo.

5. s m [LIT/ESPECT ]

   Cada unha das partes nas que se divide unha obra escénica, separada das outras por un intervalo.

6. acto administrativo [DER ]

   Declaración de vontade, de xuízo, de coñecemento ou de desexo realizado pola administración pública no exercicio dunha potestade administrativa distinta da regulamentaria.

7. acto carnal/acto sexual

   coito.

8. acto de servizo [DER ]

   Acto que fai referencia ao cumprimento da función pública por parte dun funcionario, especialmente por parte dun militar ou dun axente armado.

9. acto humano [FILOS ]

   Acto que, segundo a escolástica, provén dunha decisión libre e persoal.

10. acto morboso [MED ]

    Acto anormal que realiza un enfermo mental.

11. acto puro [FILOS ]

    Calidade que, segundo a escolástica, só se lle pode aplicar a Deus, en tanto que é pensamento puro, perfecto e ausente de materia.

12. acto reflexo [FISIOL ]

    reflexo.

13. acto voluntario [FISIOL ]

    Acción ou inhibición consciente controlada polo córtex cerebral.

14. acto xurídico [DER ]

    Feito humano realizado por unha vontade consciente e exteriorizada que produce efectos xurídicos.

Confrontacións

Citas

• Hoxe tivo lugar o acto solemne da inauguración da nova facultade
• Moitas das veces os seus actos son inexplicables