Planta leñosa, da familia das cistáceas, de follas dispostas de xeito oposto, de grandes flores hermafroditas de simetría radial, solitarias ou en cimas pouco espesas, de cáliz de sépalos libres e corola de cinco pétalos, con moitos estames e un único estilo. Os froitos son cápsulas que abren en forma de estrela.
Paisaxe aberta e, as máis das veces, de relevo chairo, onde dominan formacións vexetais constituídas por plantas perennes herbáceas ou leñosas baixas, cunha distribución horizontal regular. É propia de rexións cunhas condicións climáticas continentais, onde se combinan un gran déficit hídrico estival e un descenso acusado das temperaturas durante o inverno.
